Salüt al Piemunt

di Angelo Bergero

Da sì, da custa mia Argentina,
tera növa anduva mi sun nà,
cume un ciochin d’argent ch’avzina,
Piemunt ed mia mama e ed me papà,
me cör at salüta emossiunà

Mi sai nen per cosa ch’a sìa
che sensa cunosste it sento me.
Sarà la vus ed me pà ch’a disìa,
quand daj ricord as lassava mené:
Oh me Piemunt, nen podej turné!

A sarà magara to bel lengage,
che da mia mama l’hai imparà,
lenga ch’a parla del bel curage
ed tua rassa buna e bin anlevà
o l’amur a le cose dla nosta ca;

A l’é per lon che vöj salütete
cun custa müsica ed to parlé,
Piemunt d’Italia, vöj cunfidete:
Mi son ed Ti, da la testa aj pe,
cume na föja ed sua pianta a l’é.