Cansun quasi poética…

per servì ed bun augüri al matrimoni ed tota Teobalda Türinet cun l’intendent Morand

di Edoardo Ignazio Calvo

S’i l’aveissa un poc na müsa
ch’a valeissa dui quatrin,
ed cule veje ch’a san la rüsa
e ch’a san parlé latin!

Perché già custe giuvnote,
ch’a l’é ed poc ch’a sun sfurnià,
a stan lì cum ed marmote,
ancalo gnanca a tiré el fià.

L’han pa nen un poc cul brio,
o cul gatij ch’i vöj dì mi,
cuj bej estro ch’a l’avìo
serte müse d’autri dì.

Pur quaicos venta ch’i scriva,
L’hai promess, a l’é tütün;
am chërdran ch’i sia na piva
o ch’i sia trop digiün

A-i sarij-lo gnün poeta,
ed cuj del fonte d’Aganippe,
ch’a l’aveissa na müsa chieta,
ch’am fiacheissa nen le tripe?

Mi tütün i la fitrìa,
an pagandje so testun,
i-j promëto ch’i j’avrìa
tüte quante j’atensiun

I-j farìa dé sua biava
e so brenn e l’eva bianca,
so bujrun ed farina ed fava,
per son-sì parlumne gnanca.

Adritüra im desbütrìa
per un vers rübà dal Dante;
sent bin cos i dirìa
descurend cun Bradamante:

“Viddi sul margo del fiume Scamandro
(dì un poc vuj che sentiment!)
“Amor di sdegno e di dolor fremente,
Or Filena chiamar, ed or Filandro,

Con gesto minaccioso e viso ardente”
(oh, che roba, oh, che purtent!).
(chi sa mai perché piureissa?)
“Perchè de’ dardi suoi fatta bersaglio“.

(se sua mare lo saveissa!)
“Cruda beltà più dura che uno scoglio,
Tutte le frecce sue a repentaglio
Fè traboccare al suol per suo cordoglio“.

Cos na dive, neh, che roba!
Cula a l’é na erüdissiun
da büté ant na guardaroba,
cun ij föj dle Tradissiun.

A sun tüte filastroche,
gofe, gnëche e mal inteise,
ch’a fan rije fina j’oche
e ij minciun a noste speise.

E j’autur as na cumpiaso
e as na teno pöi da bun;
as ved bin ch’a sun ed gran asu
o pitost ed gran minciun.

I savìe ch’a l’é mia moda
ed parlé sempre piemunteis,
bin ch’adess per tüt as loda
cul ch’a parla mac franseis

Cula l’é na gofarìa:
ognidün ant so vilage
dev avej la gelusìa
de spieghesse ant so lengage.