Passaport dj’aristocràtic

di Edoardo Ignazio Calvo



Patriot repüblican,
cosa feve ed tanti nòbij?
völe ancur guerneve ij mòbij
pi pressius del vost tiran?

Völe ancura cunservé
j’assassin ch’a v’han trücidave,
cuj ch’a v’han perseguitave
per podejve sterminé?

Cuj istess che l’han massacrà
tante povre creatüre
cun le rue dle vitüre,
galopand per le cuntrà?

Cuj ch’un di ficà ant sue tur,
cun ed torment, carià ed cadene,
anrabià, cun ed mila pene,
l’han massà ij vost genitur?

Cuj ch’a pijavo voste mëssun,
vost südur, ij früt dla tera;
ch’av fasìo andé a la guera
per caprissi e per ambissiun?

Cuj ch’a guardo ij bun paisan
cum ed birbe e cum ed canaja;
cuj ch’an trato da plebaja,
cum s’i füsso tanti can?

Patriot, a l’é rivà
cul gran dì, l’ura sicüra,
che ij drit dl’om e dla natüra
a dövo esse vendicà!

Arcordeve che ij moment
sun pressius per libereve,
per esse om, per assicüreve
na sort indipendent!

Fin ch’i avrìe ed cul sang impür
ant el regn dl’egualiansa,
chité püra la speransa,
podreve mai vive sicür.

Pendije tüti tacà un trav,
o tajeje almanc la testa;
basta ün sul, ün sul ch’a resta:
tard o tost av farà sciav.

© 2016 Fondazione Enrico Eandi
Via G. B. Bricherasio, 8 | 10128 - Torino
P.IVA 10168490018
www.fondazioneenricoeandi.it