El galücio

di Nino Costa

An sla punta del cioché
j’é un galücio, caparücio
fait ed tola pitürà:
tüta quanta la giurnà
chiel a gira,
chiel as vira
da la part che el vent a tira.

El paisan d’an mes dla piassa,
quand ch’a passa,
minca tant a guarda an sü,
as n’intaja – sü per giü –
cume el temp a varierà
da la mira
che el galücio a l’é voltà.

Cul galücio fait ed tola
l’é pa tant na bestia fola:
chiel a sa
che a l’é sempre bin piassà
cul ch’as vira
da la part che el vent a tira,

e, guardand da so cioché,
chiel a vëd sel marciapé
tanta gent, piena ed babìa
ch’a je smija,
ch’a völ nen ch’a sia dla dita,
ma ant la vita
– girà ed sa, girà ed là –
l’ha l’istessa teorìa
… del galücio pitürà.