Le storie del turututela

di Nino Costa

Prima storia

A-i era un capun dla rassa paduvana
ch’as lamentava ed nen avej la crësta
e un bel galet ardì ed rassa nostrana
a-j dis che per quaic di chiel a-i la presta.

Anlura el nost capun vestì da festa
e cun la crësta del galet an testa
as na va spassegé per la campagna
süperbi cum a füssa el re de Spagna.

Ma quand ch’a l’ha vorsü fé un poc l’amur
cun na galina an serca de sfojur
a l’ha capì – per divla cum am ven –
che mac avej la crësta… a basta nen.

Scunda storia

A-i era un merlo gelus dla sua metà
che tüt el di stasìa sel “chi va là”
cun le spaghet adoss che un quaic amis
lo feissa cavajer de Stüpinis.

Chiel a vaitava tüti ij muscardin
chiel a stupava tüti ij pertüsin
e per avej le porte pi sicüre
a-j ficava el lüchet e ed saradüre.

Ma an tant che el pòver merlo a s’anmatìa
la merla da sut gamba a-j la fasìa
perché el povrom, cun tüta sua paüra,
a-j lassava düverta na filüra.