Campagna

di Don Michel Füsé

L’é un mar ed verd che a nania adasi, a stent,
la gran desteisa drüva dle campagne,
cun j’unde dle meliere e dle caussagne
e j’arbrere ch’a smijo ed bastiment.

Ferma, d’anturn, reida al gatij del vent,
la baricada sumbra dle muntagne
asürà ed lüs sl’ancrös sensa magagne
d’un cel ch’a parla al cör a so talent.

Smasì per l’aria un ciüsiuné d’uslin,
perfüm dij fen, dla menta, dla lavanda,
n’arciam d’amur e un sun ed cioca sclin.

Na vöja ed pas. Na goj drola ed piasì.
Pöi un but d’ala. E el cör ch’a vola a randa
al misteri, spassiand vers l’infinì.