Un dì o l’aut vöj fé na poesìa…

di Carlottina Rocco

Un di o l’aut vöj fé na poesìa,
ma trasparenta cume l’é un suspir,
ch’a l’abia un frisinin ed malinconìa,
cula che tüti ij dì mi cöjo an gir.

La scriverai sla fiur ed le ciochëte,
che cun la testa a dijo no e sì,
ch’a fan d’inchin sla bruva dle strajëte,
quand ch’a-j socrola el vent passand da lì.

E i vöj canté parola per parola
tüte le cose ch’i sai nen a dì,
e a sarà forse la cansun pi drola
cula cansun che adess i sai mac mi.

Tüte le cose che da n’ura a n’ura
fiurisso man a man, an me pensé,
sun lì ch’a speto la cansun ancura
cula ch’i sento e ch’i sai nen canté.

Ma un di o l’aut vöj fé sta poesìa
che tra le rime a l’abia co ed suspir,
tra le parole un poc ed malinconìa
cul poc che tüti ij di mi cöjo an gir.

La scriverai sla sima dle ciochëte
lon che sla carta ancalo nen a dì,
e le fiur an sla bruva dle strajëte
fasend n’inchin am rispundran sì, sì!

Tratto da An sla bruva del senté