Cansun dij piemunteis

di Norberto Rosa

Finalment i suma a bote!
Sé! Sta vira finalment
Sun cascane sut le piote
Custi Tüder insulent!
Metternich e sua gran prüca
Lo mandruma al diav ch’a lo cüca
Dumje al lüv, fora j’Alman,
Viva el Pòpul italian!

L’era temp che i la finieisso,
Smijavlo pa che sti grüpiun
An guerneisso, an protegeisso
Regalandne ed culp ed bastun?
Sun passà j’ani dla scola,
L’é vnü vej l’öli ed ninsola!
Dumje al lüv, fora j’Alman,
Viva el Pòpul italian!

Intré püra, intré an Ferara,
Violé püra el drit dla gent,
Buré anans; ma pijeve gara
Che el teren a l’é büjent!
guaj a vuj se Pio növ
Ven a dine da so trun:
Domje al lüv, fora j’Alman,
Viva el Popul italian!

Cume a sciopa na bumbarda,
Cume a part un culp ed canun,
(Adotand n’ünica cucarda
Dal Vesüvi al Rociamlun)
I piumbuma sü la piassa
An crijand auta ganassa:
Domje al lüv, fora j’Alman,
Viva el Popul italian!

Cherdive vuj ed fene pur
Ricordandne ij fiasc passà?
A l’é apunt ant la sventüra
Ch’un as rinforsa la curà!
La descordia a ven ed crasene,
La cuncordia a dev arlevene.
Dumje al lüv, fora j’Alman,
Viva el Popul italian!

L’é passà, povra güsaja
Cul’età che minca pais
Dlà ed so foss e ed sua müraja
A vëdìa nen che ed nimis!
Le sità sun avzinasse,
J’abitant sun ambrassasse
Dumje al lüv, fora j’Alman,
Viva el Popul italian!

Oh, avzinumse, oh, si ambrassumse
Sempre pi da bun frej;
Intendumse, sucurumse,
Grand e cit e giuv e vej;
Se l’Italia as descadena,
J’é nen Austria che a tena
Domje al lüv, fora j’Alman,
Viva el Popul italian!

Milaneis che i vive an gabia,
Venessian vendü al mercà,
Unghereis che i freme ed rabia,
Galissian sacrificà,
Fé cun nuj na santa aleansa,
Profité dla sircustansa,
Dumje al lüv, fora j’Alman,
Viva el Popul italian!