Un véj suldà

di Norberto Rosa

Oh, ch’a l’é degenerà
la cariera
tant fiera,
Oh, ch’a l’é degenerà
la cariera del suldà

Na vira l’arogansa,
L’odio, el giög, un cör da leun,
la desbaucia, l’ignoransa
l’ero noste distinsiun
Oh, ch’a l’é degenerà…

Si che alura as cunossìa
cul sistema fol futü,
ed lassé viv per curtesìa
el nimis ch’a s’é rendü!
Oh, ch’a l’é degenerà…

Cosa servlo adess ch’an mando
cuntrà ij Türc, cuntra j’Indian
se dnans ed parte a n’arcumando
d’esse duss, gentij e üman!
Oh, ch’a l’é degenerà…

Cosa l’han-ne mai da fé
je scritur ed filantropìa
cun nujauti vieux tropiers
ch’an l’anima impietrìa!
oh, ch’a l’é degenerà…

É-lo nen da pusilànim
Arfüdé na sfida al duel?
Cosa j’é-lo ed pi magnànim
ch’infilesse da fratel!
Oh, ch’a l’é degenerà…

Che custüma franc drola
Ch’a j’é naje al sécul nost:
Fé la guera cun la piüma,
an lög ed sang versé d’inciostr!
Oh, ch’a l’é degenerà…