Sij preive

di Edoardo Ignazio Calvo

Rassa ed Melchisedec,
stirpe d’Aronne,
vuj arcidiàconi,
preive e cürà,

pijé vost magnìficat,
l’eleïsonne,
dovré dle zìzole
per fé ed frità!

Per quatr vétule
ch’a-j chërdo ancura,
ch’a sun fanàtiche
ed vost paradis;

cos völe perdive?
L’é pi nen ura,
mej cari, chërdime,
cambié pais.

Vostra magnìfica,
miraculusa
lanterna màgica
sarela pur.

La rasun domina,
l’é vitoriusa,
le gent sun gràvide
de sté a le scür.

Pi gnün s’imagina
che vostre parole
fan pur al nìvule,
fan tase el trun;

che vuj i libere,
pijand cun le mole,
cule povr’anime
da ca ed Plutun;

che el diav strepita,
l’abia paüra,
quand i lo fülmine
cun l’esorcism;

che ij giari, e piàtole
chërpo adritüra
per quatr antìfone
ed vost catechism;

che vuj i stermine,
cun d’aqua frësca,
cul mal d’origin
ch’an dà la mort;

ch’i beatifiche
fin nosta aresca;
ch’in mande an gurbina
mangé ed pum d’or.

Tüte ste fròtole,
me car preive,
son piene ed càmule,
cüsìe ed bambass;

l’é méj ch’iv limite
a mangé e beive:
lassé ch’i sgambito
an santa pas.

Sensa scumüniche,
sensa indülgense,
sensa paràbole
vivruma méj:

tenive le prédiche,
voste dispense;
lassé le décime
aj vostri frej;

tenive le cròniche
per penitente,
cunteje ed bàbole
da vost ghicet;

per vost sulétic,
pijeve ed servente,
ch’apress la prédica
ve scaudo el let;

ma lassé libere,
lassé ch’is godo
le bele màchine
co daspernuj;

seguité sto métod,
ch’a l’é el pi sodo,
per tant ch’a pròspera
la pas cun nuj.