La macia russa (Finlandia)

di Nino Costa

(Gené 1940)
Sle gran desteise, bianche, an co dla tera
na macia russa ed sang a tenz la fioca,
e un sun luntan cume l’arciam ed na cioca
martela “Alarma!” ant el fracass dla guera.

J’é na cita nassiun libera e fiera
ch’as bat per sue famije e so pais
ma cuntra a l’ha na nìvola ed nemis
ne strup sarvaj ch’a pussa a la fruntiera

e a sun dui cuntra sent. Fin ch’a podran
a teno dür, ch’a j’é Nosgnur ch’a-j giüta
ma l’avnì pöl cambié ant na minüta…
Se ancöj a vincio… a resistran duman?

Tra ij trun dle bumbe e ij crij lung dle sirene
la macia ed sang se slarga an mes dla fioca…
D’antans antans as sent el sun ed na cioca
ch’a-i cria al mund: “Giütene, gent giütene”.

Ma j’autre gent meno sincere e franche
stüdio ij cuntrat e a-i penso a l’interesse…
E antant lassü, sle gran desteise bianche
… la macia russa a seguita a slarghesse.