La mia patria l’é sla muntagna

di Nino Costa

Novèmber 1943
A me fiöl Mario e a tüti i Partigian dla Val Chisun

La mia patria l’é sla muntagna
l’é sla muntagna sarvaja
cun j’Alpin ch’a dörmo sla paja
cun ij suldà sensa pan e sens’arma
ma cun l’anima fiera
perché a l’han nen tradì la bandiera.
La fioca a-j cuata e la freid a-j flagela
e la tormenta a je sgiaflela
e la miseria a-j cumpagna:
La mia patria l’é sla muntagna

La mia patria l’é sla muntagna
luntan da sto mund ch’a mercanda
na grüpia, un bindel, na curuna;
da sta gent lasaruna
ch’a-j lüstra le scarpe al tedesc ch’a cumanda,
da sta rassa falìa
che per quatr sold a fa la spia
e a cunta cun l’anima ed Giüda
ij tranta scü ch’a guadagna:
La mia patria l’é sla muntagna

La mia patria l’é sla muntagna:
l’é ansema aj pi giuv e aj pi fort
ch’a sfido la fam e la mort
perché l’Italia sia viva,
l’é ansema aj bandì dla miseria,
l’é ansema aj farchet dla speransa,
l’é ansema a j’Alpin dla vitoria
ch’a speto n’ültima gloria
da na pi giüsta campagna:
La mia patria l’é sla muntagna

Curage, fiöj dla muntagna!
dëdsà j’é quaicos ch’a rüvina
de dlà j’é quaidün ch’a s’avzina,
e l’ura l’é gnanca luntana
ch’i vëdo s’ij bric e sla piana
l’Italia ch’a turna italiana
Turnuma a pianté, sle fruntiere
noste, le noste bandiere
e che Nosgnur an cumpagna!
La mia patria l’é sla muntagna